قومي اسيمبلي ميمبرن پاران فلسطين تي جاري اسرائيلي ظلمن ۽ اسماعيل هانيه جي شهادت جي مذمت

اسلام آباد-02 آگسٽ (اي پي پي) مختلف سياسي پارٽين سان تعلق رکندڙ قومي اسيمبلي جي ميمبرن فلسطين تي اسرائيل طرفان جاري ظلمن ۽ فلسطين جي اڳوڻي وزيراعظم اسماعيل هانيه جي شهادت جي سخت لفظن ۾ مذمت ڪندي چيو آهي ته ايران ۾ صرف اسماعيل هانيه کي نه شهيد ڪيو ويو پر عالمي اخلاقيات جون ڌڄيون اڏايون ويون، نام نهاد انساني حقن جا علمبردار ملڪ ان لاءِ خاموش آهن ته مسلمان امت ۽ فلسطيني ڪمزور آهن، طاقتور پنهنجي طاقت جي نشي ۾ هر اها حد پار ڪري رهيو آهي جيڪا انسانيت جي تذليل آهي، ظلم جي رات ڪيتري به ڊگهي ڇو نه هجي صبح ضرور ٿيندو. ڪالهه قومي اسيمبلي ۾ فلسطينين تي ٿيندڙ اسرائيلي ظلم ۽ اسماعيل هانيه جي شهادت تي پيش ڪيل متفقه قرارداد تي ڳالهائيندي اڳوڻي وزيراعظم راجا پرويز اشرف چيو ته جيڪو شخص انساني قدر، انساني حقن ۽ انسانيت تي يقين رکي ٿو فلسطين جي صورتحال تي اهي سڀ ڏکويل آهن، فلسطينين تي ظلم جا پهاڙ ٽوڙيا وڃن پيا انهن تي زندگي تنگ ڪئي پئي وڃي، اهو سڀ ڪجهه ان لاءِ ٿي رهيو آهي جو مسلمان امت ۽ فلسطيني ڪمزور آهن. اسرائيل ۽ ان جا ساٿاري تمام گهڻو طاقتور آهن، اهي طاقتون جانورن جي حقن جي خلاف ورزي جون ڳالهيون ڪن ٿيون، ماحوليات جي ڳالهه ڪن ٿيون پر افسوس اسرائيل فلسطينن تي ظلم ڪري رهيو آهي، ان حوالي سان اهي نام نهاد انساني حقن جا علمبردار ملڪ نه ڳالهائي رهيا آهن، هي ڪمزور ۽ طاقتور جي جنگ آهي، طاقتور پنهنجي طاقت جي نشي ۾ هر اها حد پار ڪري رهيو آهي جيڪا انسانيت جي تذليل آهي. هن چيو ته سلامتي ڪائونسل، جنيوا ڪنوينشن ۽ انساني حقن جون تنظيمون وڏيون وڏيون ڳالهيون ۽ دعوائون ڪن ٿيون اڄ اهي ڪٿي آهن. هن چيو ته مريضن کي به ماريو پيو وڃي ۽ مئلن تي به بمباري ڪئي پئي وڃي. هن چيو ته ايران ۾ صرف اسماعيل هانيه کي شهيد نه ڪيو ويو پر عالمي اخلاقيات جون ڌڄيون اڏايون ويون آهن، اهو جن خلاف ٿي رهيو آهي اهي ڪمزور آهن.هن چيو ته فلسطين جو عوام ۽ اسماعيل هانيه جي خاندان جون لازوال قربانيون آهن، ان صورتحال تي سوچڻ جي ضرورت آهي ۽ ايوان ۾ متفقه قرارداد جي منظوري سٺو سنئوڻ آهي، اسان جي ڳالهه ۾ اثر ان لاءِ نه رهيو جو اسان پنهنجو پاڻ کي ٻين معاملن ۾ الجهائي رکيو آهي. اسان ننڍن ننڍن معاملن تي ورهايل آهيون.اسان جي معيشت ڪمزور آهي ان صورتحال ۾ اسان پنهنجو فرض ادا ڪيو آهي پر اسان جي ڳالهه ڪير ٻڌندو. بئريسٽر گوهر علي چيو ته فلسطين تي اسرائيلي ظلم انتهائي افسوسناڪ آهي، اهو مسئلو صرف قراردادن سان حل نه ٿيندو، عالم اسلام سميت عالمي برادري کي ان سلسلي ۾ ٺوس قدم کڻڻا پوندا. جي يو آءِ (ف) جي ميمبر مولانا عبدالغفور حيدري فلسطين تي اسرائيلي ظلم ۽ ايران ۾ اسماعيل هانيه تي حملي جي مذمت ڪئي ۽ دعا ڪئي ته اللل تعاليٰ اسماعيل هانيه جي شهادت کي قبول ڪري الله تعاليٰ ان جي شهادت جي تفصيل اسرائيل کي نيست و نابود ڪري. هن چيو ته فلسطيني گذريل 60 سالن کان پنهنجي آزادي جي جنگ وڙهي رهيا آهن ۽ قربانين جي هڪ لازوال مثال لکي رهيا آهن، فلسطين جي سرزمين نبين جي سرزمين آهي ان تي اسرائيل جو ڪو حق ناهي، اها زمين فلسطينين جي ملڪيت آهي، ايم ڪيو ايم پاڪستان جي پارلياماني اڳواڻ ڊاڪٽر خالد مقبول صديقي چيو ته اسماعيل هانيه جي شهادت ۽ ان تي عملي کي اسان پنهنجو پاڻ ۽ پاڪستان تي حملو سمجهون ٿا، اسرائيل هڪ دهشتگرد رياست آهي، اهو واقعو گڏيل قومن جي وجود تي سوال آهي، اسان فلسطينين جي آزادي جي جدوجهد جي حمايت کي پنهنجو فرض سمجهون ٿا. محمود خان اچڪزئي چيو ته پاڪستان نيتن ياهو خلاف انسانيت جي قاتل طور انصاف جي عالمي عدالت ۾ ڪيس داخل ڪري ، حميد حسين چيو ته اسماعيل هانيه جي شهادت مسلمان امت لاءِ وڏو سانحو آهي. امير مقام چيو ته اسان جا جذبا ۽ احساس فلسطيني عوام سان گڏ آهن، ايوان مان ان جي حق ۾ متفقه قرارداد جي منظوري سٺو سنئوڻ آهي. مسلم ليگ ضياءُ جي سربراهه اعجاز الحق چيو ته اسماعيل هانيه تي ايران ۾ حملو ايراني خودمختياري خلاف آهي، ايوان ۾ متفقه قرارداد جي منظوري سٺو سنئوڻ آهي،اسان کي ٻين اجتماعي معاملن ۾ به اهڙي طرح اتفاق راءِ جو اظهار ڪرڻ گهرجي.