افغانستان ۾ مستحڪم ۽ جامع حڪومت خطي جي مفاد ۾ آهي: چوڌري فواد حسين

اسلام آباد – 22 – سيپٽمبر (اي پي پي) اطلاعات ۽ نشريات واري وفاقي وزير چوڌري فواد حسين چيو آهي ته افغانستان ۾ مستحڪم ۽ جامع حڪومت خطي جي مفاد ۾ آهي، پاڪستان جي خلاف هر دور ۾ سازشون ٿينديون رهيون آهن، تنهن هوندي به پاڪستان هر بار نئين طاقت سان اڀريو آهي، قيادت جي لاءِ همت، حوصلي ۽ قسمت جو هجڻ ضروري آهي، پاڪستان ۾ ڪيترن ئي سالن تائين حڪمراني ڪندڙ لنڊن ۾ مفروريت جي زندگي گذاري رهيا آهن، پاڪستان سدائين ڀارت سان بهترين لاڳاپن جي ڳالهه ڪئي آهي،ڀارت جي موجوده قيادت پاڪستان سان بهترين لاڳاپن ۾ رڪاوٽ آهي، نريندر مودي والاريل ڪشمير ۽ گجرات ۾ مسلمانن جي قتل عام سان پنهنجو قدم وڌايو. اهڙن خيالن جو اظهار هن ليڊرز ان اسلام آباد بزنس ڪانفرنس کي خطاب ڪندي ڪيو. اطلاعات واري وفاقي وزير چيو ته 1100 منصوبا مختلف وزارتن تحت شروع ڪيا پيا وڃن، هن چيو ته منهنجي نظر ۾ قيادت لاءِ ٽي بنيادي شيون همت، حوصلو ۽ قسمت ضروري آهن، ڪنهن ليڊر جي ڪاميابي يا ناڪامي جو دارومدار انهن ٽن شين تي هوندو آهي، هن چيو ته افغانستان جي اندر ڀارت اربين ڊالر جي فنڊنگ ڪئي پر قسمت ان جو ساٿ نه ڏنو، جڏهن قسمت ساٿ نه ڏئي ته پئسن سان به ڪجهه ناهي ٿيندو، هن چيو ته جڏهن اشرف غني کي رات جو اڍائي وڳي افغانستان مان فرار ٿي ازبڪستان وڃڻو پيو ته سندس پراڻن دوستن به کين سڃاڻن کان انڪار ڪري ڇڏيو، هو صدر جي حيثيت سان افغانستان مان نڪتو ۽ هڪ مفرور جي حيثيت اختيار ڪري ورتي، هن چيو ته پاڪستان ۾ ٽي ٽي ڀيرا وزيراعظم رهندڙ به اڄ برطانيه ۾ مفروريت جي زندگي گذاري رهيا آهن. هن چيو ته پاڪستان جي خلاف هر دور ۾ سازشون ٿينديون رهيون آهن، 20 سالن جي دوران پوري ڪوشش ڪئي وئي ته پاڪستان کي خطي جي ليڊرشپ کان محروم ڪيو وڃي، افغانستان جي اندر هڪ اهڙي حڪومت رهي جنهن جو مقصد صرف پاڪستان کي ڪمزور ڪرڻ هو ۽ اسان جي اڀرندي ۽ اولهندي سرحدن تي اهڙي سازشي ڄار بڻجڻ جي ڪوشش ڪئي وئي ته پاڪستان ڪمزور ٿئي پر اڄ الحمد الله 20 سالن کانپوءِ سازشون ڪندڙ ڀٽڪي رهيا آهن ۽ پاڪستان خطي ۾ وڌيڪ مضبوط ملڪ جي طور تي اڀريو آهي. اڄ خطي ۾ فيصلن جي لاءِ پاڪستان طرف ڏسي رهيو آهي، وفاقي وزير چوڌري فواد حسين چيو ته افغانستان ۾ جامع حڪومت جي ڳالهه هجي، وچ ايشيائي رياستن کي سي پيڪ سان ملائڻ يا يورپي يونين ۽ سي پيڪ جو رابطو جوڙڻ هجي، انهن سمورين ڳالهين جو تعلق پاڪستان جي فيصلن جي چوڌاري گهمي ٿو. اهو تاريخ جو هڪ وڏو موڙ آهي ته پاڪستان خطي جي فيصلن جو هڪ اهم پليئر بڻجي ويو آهي، هن چيو ته اسان ازبڪستان سان ٻن معاهدن تي صحيحون ڪيون آهن، اسان گوادر ۽ ڪراچي کي مزار شريف تاشقند جي ذريعي ملائڻ چاهيون ٿا، اهڙي طرح اسان چاهيون ٿا ته گوادر يا ڪراچي کان وچ ايشيائي رياستن ڏانهن ويندڙ ٽرڪن جو ڪسٽم تاشقند ۾ وڃي ٿئي، اهو اسان جو گلوبل ڪنيڪٽيويٽي جو فريم ورڪ آهي، ان فريم ورڪ جي ذريعي سي پيڪ، وچ ايشيائي رياستن ۽ پوءِ يورپي يونين سان جڙي ويندو آهي ان سان اسان جي حيثيت تبديل ٿي ويندي. هن ٻڌايو ته اسلام آباد کي هڪ منفرد مقام جي حيثيت حاصل آهي دنيا جي 64 سيڪڙو آبادي اڍائي ڪلاڪن مان ٽي ڪلاڪ جي فلائيٽ ريڊيس جي مٿان آهي، اسان جي هڪ طرف چين ۽ ٻي طرف هندستان آهي، اسان ڀارت سان ان لاءِ لاڳاپن ۾ بهتري چاهيون ٿا ته اسان دنيا جي ٻن وڏين منڊين جي وچ ۾ هڪ وڏي ڪنيڪٽيويٽي روڊ فراهم ڪنداسين پر ڀارت سان بهتر لاڳاپن جي راهه ۾ سڀ کان وڏي رڪاوٽ ڀارت جي حڪمراني پارٽي آهي جيڪا ان بنياد تي ووٽ وٺي آئي آهي ته هو مسلمانن کي ختم ڪندي، اهو نه رڳو پاڪستان جي خلاف آهي پر ان والاريل ڪشمير ۽ گجرات ۾ به مسلمانن جو قتل عام ڪيو، نريندر مودي مسلمانن جي قتل عام ۽ ان جي لاشن تي پير رکي پنهنجو قدم وڏو ڪيو آهي. هن چيو ته ڪشمير جو مسئلو حل ٿي وڃي ٿو ته شايد سڀاڻي ئي اسان جا لاڳاپا بهتر ٿي وڃن، ان کانپوءِ خطي جي تقدير بدلجي سگهي ٿي، اطلاعات واري وفاقي وزير چيو ته اسان سدائين افغانستان جي اندر جامع حڪومت جي جوڙجڪ تي زور ڏنو، وزيراعظم ڪالهه به بي بي سي کي پنهنجي انٽرويو ۾ چيو ته افغانستان جي اندر اڪثريت پختونن جي آهي ۽ تمام وڏ مينارٽي تاجڪن جي آهي، هن چيو ته تاجڪستان جي صدر امام علي رحمانوف کي تاجڪن ۾ قدر جي نگاهه سان ڏٺو ويندو آهي انهن سان وزيراعظم جي ڳالهه ٿي آهي، اسان جي افغانساتن ۾ طالبان سان به ڳالهيون ٿي رهيون آهن، اسان کين چئي رهيا آهيون ته جيساتئين تاجڪ ۽ پختون پاڻ ۾ گڏجي حڪومت سازي نٿا ڪن، افغانساتن ۾ استحڪام نٿو اچي سگهي، وزيراعظم اشرف غني کي به چيو هو ته هو هڪ جامع حڪومت طرف وڃن، اسان سمورن ڌڙن کي گهرايو ۽ انهن سان ڳالهيون ڪرڻ جي ڪوشش ڪئي پر انهن ڳالهين کي اشرف غني سبوتاز ڪيو ۽ ان کانپوءِ جيڪا صورتهال پيدا ٿي ان جي نتيجي ۾ اشرف غني کي افغانستان ڇڏڻو پيو. هن چيو ته هاڻي به اسان اهو چئي رهيا آهيون ته افغانستان ۾ هڪ نسلي گروپ حڪومت ٺاهيندو ته ٻيو گروپ جنگ شروع ڪري ڇڏيندو، ان لاءِ افغانستان ۾ جامع حڪومت ضروري آهي، هن چيو ته پاڪستان جو قائداڻو ڪردار هڪ مستحڪم افغانستان کي جنم ڏيندو، ان جي نتيجي ۾ ڪنيڪٽيويتي جي ويزن کي پڄاڻي تائين پهچائينداسين، چوڌري فواد حسين چيو ته پاڪستان جي خلاف سازشون ٿينديون رهيون آهن، هر سازش کانپوءِ پاڪستان پهرين کان وڌيڪ مستحڪم ۽ وڌيڪ وڏو گلوبل ليڊر بڻجي اڀريو آهي.